Tuesday, November 27, 2007

nagpabiling nagpahiyum

alas otso sa gabii,
didto sa bo's coffee.
nagkita mig balik sa akong amigo
nga dugay na naku nakahinabi.
"kamusta naman ka?" pangutana niya
ako nagpahiyom ug dayon
sabat nga ok ra ko.


"ambi naku kay nilarga nakag Dubai,
kay gusto nimo makahuman imong mga manghud ug skwela."
daw nawala akong tingug sa akong tutunlan sa dihang iya pa tong nahinumduman,
mga yawyaw ug plano sa akong way klarong kinabuhi.
wala siya kaybalo nga ang pinakahinungdan nga moadto ko'g abroad
kay aron makalimot ko niya.


kalit nalang ko'g punit sa tisue
ug akong gipahiran akong baba sa kape nga nisidsid sa akong mga ngabil.
mao sad ang akong pagkahinumdum lima na ka tuig ang nilabay sa among kinalasang paghiuban.


...


didto sa Starmart, tunga-tunga sa gabii
gainom mig kape aron pawala sa duka ug painit sa among gakurog nga mga dughan.
nagstorya mi bahin sa klase-klaseng mga matang. mga pangandoy ug mga pagbating natabunan na sa abog sa paspas kaau nga panahon. nahutdan nalang mig mga pulong na masampit ug hangtud nalang iya kong gi hagkan.


daw sama sa suga nga nisiga,
akong mga mata ni sigrab
ug akong mga ngabil nagsampit sa iyang ngalan.
apan naka dama ko nga adunay paghugot sa iyang ginhawa
daw adunay liboan nga lugas sa humay
ang moawas sa gamayng lungag sa iyang pagbati.
sa walay pagpugong, nisulti siya kanako nga molangyaw na siya sa gawas sa nasud
aron manginabuhi ug wala siya kaybaw kung kanus-a pami magkita ug balik..
kahilum.
daw niagi ang ginoo sa among luna,
ug ang kamingaw ni dangoyngoy sa among mga nilubad nga pangisip.
gusto niyang i-tugan sa akoa nga ako magpabilin sa iyang kasing-kasing
pero daghang mga matang na sukwahi sa iyang kabubut-on.
apan wala naku kasabot sa iyang mga panulti tungod kay susama naman iyang tingug sa usa ka makabibihag nga langgam na nagkumbabit sa usa ka sanga apan molupad lang kini ug dili na madunggan pa.


lima na ka tuig sa diha akong dughan kinalasang ni taghoy.
lima na ka tuig ang nilabay sa kinalasang katamis ug pagmaya. lima ka tuig nagmaoy kining dughan ko,
lima ka tuig ug ayaw pun-i pa..


...


ug karon,
ako nang gisuyop
ang kinalasang kapait
sa kape
gikan sa akong gilama nga tasa
didto sa nanghupong nga tutunlan


ug nagpabiling nagpahiyum.

No comments:

Follow this blog with bloglovin

Follow my_hotmug

Bjork! Bjork! Bjork!

2

As Time Goes By

Trekkers