Friday, May 09, 2008

mubangon ko sa hinay-hinay




inig buntag
gusto kong mubangon sa imong tupad
diin akong dughan
nagpahipi
sa imong abaga
gusto kung hinayhinay ug gawas
sa habol ug sa imong akbay
nga maski sa kabog-aton sa imong mga bukton,
dili ko mawad'an ug ginhawa.

mubangon ko sa hinay-hinay
aron ang imong pag-hagok magpa-dayon
ug kalit modapyos kining mga hamis kung batiis
sa imong balbon nga paa
hangtud nga mahinkawas ko sa imong
nagpahulay nga lawas.

inig buntag
gusto kong mubangon sa imong tupad
susama sa usa ka liso
nga nalubong sa yagmok nga yuta
kalit nabis-bisan
kalit na-initan
mutorok, mutobo ug mamuwak

mubangon ko sa hinay-hinay
aron masinati ko ang puro nga pagkakaron
usa ka matang dili naku ma-kumkum
diin ang kagahapon gilamoy ang kaugmaon
kay ang tanang kasanatian
usa ka pagdumdum na lamang

No comments:

Follow this blog with bloglovin

Follow my_hotmug

Bjork! Bjork! Bjork!

2

As Time Goes By

Trekkers