patay'ng suba

susihon namo ang imong ginhawaan
subayon namo ang dalan
padulong sa imong tiyan
ug naugon ang mga ang-ang sa imong puson

aduna ka bay gusok,
kumagko o saag nga bukog?
aduna ka bay atay
nga modalit ug apdo
o dili ba batikoon
nga mohilis sa imong kinaon

maski nagkasangit-sangit
sa nagkaguliyang kaugatan,
baktason namo ang mga suok-suok
sa imong tina-i
ug sayawan ang entablado
sa imong sabakan

apan dili kini makapatukar
sa imong karaang sonata
ug dili na makapalitok
sa imong pulong

mao na nga gingsuka mo kami
sa imong baba
diin imo kaming gilumsan
sa kamatuoran
diin ang among kinalasang lakang
dili na masubay ug dili makaplagan